LAOAG CITY – Maladingitan ni Mrs. Imelda Faylogna iti Barangay Balaoi iti ili ti Pagudpud gapu iti pannakapukaw ti balay da iti napasamak nga uram.
Malaksid iti balay da Faylogna ket adda pay innem a pagtaengan a karaman a nauram.
Segun kenkuana, awan pulos ti nasalbar da a gamit iti uneg ti balay da isut gapuna a saanda nga ammo no kasanu da manen a mangrugi.
Kuna na a karaman kadagiti nauram a kagamitan da iti pannakauram ti balayda ket ti maysa a refrigerator, 2 a washing machine, maysa a laptop, motorsiklo, printer ken cellphone.
Inbatad na a saanna nga ammo no ania ti nangrugyan ti uram gapu ta ti inapoy da ket linuto da paylaeng ti rabii ken awa pulos nakasaksak nga appliances da sakbay a napan da nagtrabaho.
Kabayatanna, kuna ni Mayor Rafael Benemerito iti ili ti Pagudpud a basar iti report kenkuana ket nangrugi ti uram iti nabaybay-an a dalikan no sadinno a dagiti bumalay ket napanda naki-birthday iti karruba da.
Inpakaammo pay ti mayor nga alisto a nagkayamkam ti apoy gapu ta napigsa ti angin ken naaramid pay dagiti balay iti light materials.
Inpalgak ni Mayor Benemerito a ti pagsayaatan na ket awan dagiti nadangran a residente iti napasamak nga uram.
Inkari ti mayor ti pannakaipaay ti naan-anay a tulong para kadagiti pito a pamilya a napukawan ti pagtaengan iti Barangay Balaoi iti ili ti Pagudpud.
Mainaig iti daytoy, inpakaammo ni Barangay Chairman Bong Respicio a dagiti dadduma a pamilya a napukawan ti pagtaengan gapu iti napasamak nga uram ket temporaryo a pinagtalinaed na iti balay da idinto a dagiti dadduma ket napan da paylaeng nakipagnaed kadagiti kabagyan da.
