LAOAG CITY – Umabot ti pito a nagduduma a kadakkel na a sachet ti naala dagiti otoridad iti naiyuswat a search warrant operation iti Barangay 46, Nalbo ditoy ciudad ti Laoag.
Nabigbig ti subject ti operasyon a ni Mr. Jackie Ancheta, agtawen ti 44 ken residente iti nasao a barangay.
Nakailanad iti search warrant a ti biruken dagiti otoridad ket iligal a droga.
Inpetteng met ni Ancheta a saan na a kukua dagiti naala a maipagarop nga iligal a droga gapo ta saan nga aglaklako iti kastoy.
Kunana a saan na nga ammo no apay a naiyuswatan ti operasyon gapo ta awan met ti ammo na a nakariri wenno nakairamramanan na nga iligal nga aktibidad no diket agideldeliver laeng kadagiti prutas.
Inlawlawag met ti menor de edad a kaanakan ti subject nga adda ti nakita na a maipagarop a simrek iti uneg ti balay da a lalaki a naka-mask, nakabado ti nangisit ken adda ti inkabil na iti pungan ti subject.
Inbaga na nga inbatad ti lalaki iti maysa pay a lalaki a saan da a sagsagiden ti maipagarop a naipan iti pungan.
Innayon ti ubing nga idi nakita ti lalaki isuna ket maipagarop a nagtaray a rimwar.
Naamoan a ti nakaalaan dagiti sachet ti maipagarop nga iligal a droga ket ti pagturugan ti subject nga isu ti dakdakamaten ti menor de edad a maipagarop a nagserkan ti maysa a lalaki sakbay ti operasyon.
Nupay kasta, kuna ni Police Lt. Col. Rafael Lero, ti chief of police ti PNP-Laoag a basar iti intelligence report ken positibo a surveillance da isut gapo na nga inyuswat da ti operasyon.
Kunana nga agtultuloy ti imbestigasyon da no adda pay ti sabali nga iligal nga aktibidad ni Ancheta.
