LAOAG CITY – Kinumpirmaran ni Police Major Christian Felix, ti deputy chief of police ti PNP-Laoag nga umabot iti pito nga indibidual dagiti natiliw iti naiwayat nga anti illegal gambling iti maysa a minatayan iti Barangay Suyo ditoy ciudad.
Kunana a karaman kadagiti natiliw ket manipud iti ili ti San Nicolas, Pasuquin ken Solsona.
Segun kenni Felix, malaksid kadagiti natiliw ket adda pay ti tallo a kakadua dagitoy a naglibas nga isu ti agdama a birbiroken da.
Inbatad na nga awan met ti komento dagiti indibidual nangruna ket ammo da a naiget a maiparit ti panagsusugal ken iti agdama ket adda iti babaen ti Enhanced Community Quarantine (ECQ) ti ciudad.
Gapo iti daytoy, malaksid iti sangwen da a kaso a panaglabing iti Presidential Decree 1602 ket naikkan pay dagitoy ti citation ticket gapo iti panagsalungasing da iti curfew, social distancing, ken saan a panagisuot ti facemask.
Naamoan a ti maysa kadagiti mabirbirok iti agdama ket maysa a tanod iti barangay.
Kabayatanna, nagkedked pay laeng a mangipaay ti naan-anay a komento dagiti opisyal ti barangay gapo ta ur-urayen da pay laeng ti imbestigasyon ti PNP.
Nupay kasta, kuna ni Barangay Secretary Edmar Tagama nga idi nakadanon da iti mismo a lugar ket nalpasen ti operasyon ken nakalibasen ti barangay tanod ken dagiti dua a sabsabali pay.
