LAOAG CITY – Naarestar dagiti pito nga indibidual kalpasan a nagsusugal daytoy iti maysa a minatayan iti ili ti Marcos.
Basar iti Marcos Municipal Police Station, dagiti akusado ket da Randy Bayudan, agtawen ti 48, Arturo Malinit, agtawen ti 38, Maynard Monje, agtawen ti 33, Fitzgerald Fernando, agtawen ti 25, Fitzgerald Fernando, agtawen ti 18, a residente iti Brgy. Elizabeth ken ida Ranel Magno, 38 ken ni Roel Diego, 46 nga agpapada a residente iti Brgy. Ferdinand iti nasao nga ili.
Segun ken ni P/Lt/Cl Roldan Suitos, hepe ti Philippine National Police iti nadakamat nga ili a naarestar dagitoy babaen iti nagtipon a puersa ti Marcos Municipal Police Station ken 2nd Ilocos Norte Police Mobile Force gapu iti panaglabsing da iti Presidential Decree 1602 wenno iti illegal gambling law.
Basar iti imbestigasion, ti arrest warrant kontra Corpus ket impaulog ni Hon. Kira Mangapit Espino, Presiding Judge ti Municipal Circuit Trial Court, First Judicial Region, Dingras-Marcos.
Kabayatanna, narekomendaran nga agpyansa dagitoy iti gatad a P10,000.00 iti tunggal maysa kadakuada para iti temporary a pannakawaya-waya da.
Maipalagip naireklamo dagiti nadakamat nga akusado kalpsan natakuatan dagitoy nga agsusugal iti maysa a minatayan iti nasao a barangay idi napalabas a bulan.
