LAOAG CITY – Ado dagiti Pilipino idiay Lesotho a nadismaya gapu ta saan da a matuloy nga agawid ditoy Pilipinas kalpasan nga adda ti nairekord nga omicron variant iti South Africa.
Daytoy ti report ni Bombo International Correspondent Ryan Castillo Tantuan iti Lesotho.
Inbatad ni Tantuan a sakbay pay a rimuar ti omicron variant ket adon dagiti Pilipino idiay Lesotho a nakaplano nga umay agbakasyon ditoy pagilyan.
Nupay kasta, gapu iti omicron variant ket plano ti gobierno a paserraan dagiti border iti Lesotho rason a saan pay laeng a makaruwar dagiti residente a pakairamanan dagiti Pilipino iti nasao a pagilyan.
Mainaig iti daytoy, kuna ni Tantuan nga adda ti pannakaalarma da gapu ta no adda ti krisis ket awan ti namnamaen da a tulong manipod iti gobierno idiay Lesotho.
