LAOAG CITY – Nagballaag ti maysa a nangato nga opisial ti United Nations a posible a mangitunda ti sabali manen nga humanitarian crisis ti plano a militar ti Israel nga alaen ti kontrol idiay Gaza City.
Inbatad ni United Nations Assistant Secretary General Miroslav Jenca iti taripnong ti United Nations Security Council, ti panangipatungpal ti nasao a plano ket mabalin nga agresulta iti dakkel nga epekto iti rehion pakairamanan ti nayon nga inkapilitan a panangibakwit, pannakatay dagiti sibilian ken pannakadadael dagiti imprastruktura.
Maiyuswat ti naisangsangayan nga emergency meeting ti Security Council ita a lawas kalpasan nga inaprobaran ti security cabinet ni Prime Minister Benjamin Netanyahu ti gakat.
Gapu iti daytoy, nangipeksa ti reaksion dagiti nagduduma a pagilian pakairamanan ti Britain nga iti baet a kaalyado ti Israel ket nagballaag a posible daytoy a mangiyalud-od pay ti mapaspasamak a rinnupak.
Nupay kasta, inpetteng ni Netanyahu nga awan ti gagemda a sakupen ti Gaza ken kalikagumda laeng a lippasen ti gubat iti kabiitan a panawen.
