LAOAG CITY – Kinumpirmaran ni Barangay Kagawad Jay-Z Lagundino, iti Sitio Banquero, Brgy. Pancian iti ili ti Pagudpud nga umaboten ti lima nga aldaw nga awanan da ti suplay ti kuryente.
Daytoy ket gapu paylaeng ti pannakagabur dagiti linya ti kuryente ken poste kalpasan ti panagreggaay ti daga iti nasao a lugar.
Kuna na a mabayag pay sakbay a mawaknitan ti kalsada iti nasao a barangay gapu ti kalawa ti nagaaburan.
Mainaig iti daytoy, inpakaammo ni Lagundino ti panagballasiw dagiti residente a bumallasiw babaen ti panagplete da iti 200 a pisos iti kada maysa a ti pagluganan da ket bilog.
Inbatad na nga umabot ti nasurok maysa nga oras ti biyahe dagiti maseknan ken umabot ti 15 a tattao ti maximum capacity ti bilog.
Inlawlawag ni Lagundino a saan nga agpapada ti bayadan gapu ta nanginngin no napaspaspas ti biyahe.
Kuna na a kas iti panagbiyahe da ket tallo a motorboat ti nangguyod ti maysa a dakkel a bangka ken naannayas met ti pannakaibiyahe dagiti tattao gapu ta nasayaat ti sitwasyon ti baybay.
Innayon ni Lagundino nga adda pay ti dua a bangka ti Philippine Coast Guard a mangbanbantay ti panagbiyahe dagiti maseknan ken agilugan da met kadagiti tattao.
