LAOAG CITY – Ad-adda pay a pinaigetan ti Philippine National Police ti panagmonitor da kadagiti nagduduma a barangay iti ili ti San Nicolas tapno mapagtalinaed ti linak, urnus ken talna.
Daytoy ti inbatad ni Police Capt. Sygman Benigno, ti chief of police iti ili ti San Nicolas.
Inpakaammo ni Benigno nga adda latta dagiti kameng ti pulisya a nakabantay kadagiti protect box iti nadakamat nga ili tapno adda ti dagus a pagreportan dagiti umili no bilang adda dagiti mapasamak nga aniaman nga insidente.
Kabayatanna, nagyaman ni Benigno iti tulong dagiti umili tapno mangpugipog kadagiti mapaspasamak a krimen iti ili ti San Nicolas.
Innayon na a dakkel ti nagbalin a tulong dagiti impormasyon dagiti umili kadagiti nagsasaruno nga insayangkat da nga anti-illegal drug buy-bust operation iti nadakamat nga ili.
