LAOAG CITY – Kinumpirmaran ti Philippine National Police (PNP), a naipatuluden dagiti intelligence ken tracker teams para iti agtagikua ti St. Timothy Construction a ni Sarah Discaya ken dadduma pay a karaman iti “ghost” flood control project iti Davao Occidental.
Inbatad ni PNP Chief Jose Melencio Nartatez, Jr. a manarimaanen ti pannakikoordinar ti nailian a pulisya iti dadduma nga ahensya kabayatan ti panagsagsagana da iti issuance ti warrants of arrest kontra kadagiti suspek.
Karaman pay a sagsaganaan da ket ti panagkolektar ti impormasyon no sadinno ti mabalin a paglemmengan dagiti suspek.
Naalerto metten dagiti barangay ken neighborhood watch groups tapno i-report dagiti napapateg nga impormasyon.
Ginutigot ni Nartatez ti publiko a makitinnulong kadagiti otoridad tapno masigurado ti accountability ken proteksyon ti pampubliko a pondo.
Maipalagip nga idi biernes ket nagpila ti Ombudsman ti graft ken malversation cases kontra ken ni Discaya, dagiti opisyal ti public works, ken dadduma pay nga adda ti pakainaigan na iti ₱96.5 milyon a “ghost” flood control project.
Segun ken ni Ombudsman Jesus Crispin Remulla, agdama nga adda iti Pasig City ken under surveillance ni Discaya.
