LAOAG CITY – Awan ti impormasion ti Philippine National Police (PNP) mainaig iti report a panangarestar ken ni dati a Philippine National Police Chief ken itan a Senador Ronald “Bato” Dela Rosa.
Inbatad ni Philippine National Police Spokesperson PBGen. Randulf Tuaño, awan ti report-da mainaig iti maipagarup a dandanin a panangarestar iti dati a Police General.
Daytoy ket kalpasan nga adda dagiti rumrummuar a damag nga arestaren dagiti pulis ni Dela Rosa kalpasan a naammoan ti lugar a paglemlemmenganna.
Naammoan a ti arrest warrant ket maipagarup nga adda ti pakainaiganna iti panagbalin nga hepe ni Dela Rosa ti Philippine National Police (PNP) idi inpatungpalna ti war on drugs campaign iti babaen ti administrasion ni dati a Presidente Rodrigo Duterte a sumangsango ita iti kaso a crimes against humanity iti International Criminal Court.
Naglikudan met ni Interior and Local Government Secretary Jonvic Remulla ti report a maarestaren ni Dela Rosa.
