LAOAG CITY – Inbatad ni Police Lt. Col. Joseph Baltazar, ti chief of police ditoy ciudad ti Laoag a ti makitkita da a makaigapu kadagiti napaspasamak a desgrasya ket ti kaawan ti disiplina dagiti sumagmamano nga agiturturong ti behikulo kangrunaan na dagiti nakamotorsiklo, tricycle wenno kurung-kurong.
Inpetteng na nga uray makita dagiti maseknan nga alanganin ket ilusot da latta dagiti lugan da a pakaitundaan ti desgrasya.
Mainaig iti daytoy, inpalgak ni Baltazar a para kadakuada ket awan ti makita da a pagkurkurangan iti Philippine National Police kadagiti mapaspasamak a desgrasya ditoy ciudad ti Laoag.
Inlawlawag na a kanayun ti panagpalagip da kadagiti drivers seknan dagiti pagalagadan iti panagmaneho, adda pay dagiti traffic signs a suruten dagiti motorista, mangipapaay da ti lectures ken adda dagiti nakapaskil nga speed limit kadagiti kalsada a rumbeng a suruten dagiti maseknan.
Innayon na nga agtultuloy pay ti panangiyuswat da ti checkpoints ken no adda dagiti behikulo a nakurang ti dokumento na kas iti lisensya ken adda ti makita da a saan a maikanatad iti lugan ket insigida nga iyuswan da ti ticket.
Inpetteng ni Baltazar a no adda ti naan-anay a panagannad dagiti motorista ket maliklikan ti pannakadesgrasya a mabalin a pakaisagmakan ti biag.
Maipalagip nga addan ti dua nga indibidual ti pimmusay ita laeng a bolan malaksid pay kadagiti nasugsugatan gapu kadagiti napaspasamak a nagsasaruno a desgrasya ditoy ciudad.
