LAOAG CITY – Naiget a nagballaag ni Philippine National Police Chief Gen. Rommel Francisco Marbil iti asinoman nga aggandat a mangriribok iti 2025 Midterm Elections inton Mayo.
Segun ken ni Gen. Marbil, mapagsungbat iti linteg ti asinoman nga agaramid ti kinaranggas wenno panangbutbuteng iti panawen ti eleksion.
Inpasingkedna a saan nga ipalubos ti nailian a pulisia nga isakripisio ti kinatalged ti publiko gapu laeng iti bukud nga interes dagiti pulitiko.
Inpetteng ni Marbil a ti kangrunaan a responsibilidad ti Philippine National Police ket siguradoen nga agbalin a naurnos, patas ken nakappia ti eleksion isu nga agbalin nga alerto ti Philippine National Police iti pananglapped ti aniaman a klase ti political violence.
Kabayatanna, uray nakatutok iti seguridad ti eleksion, agtultuloy ti laban ti Philippine National Police kontra iti kriminalidad, iligal a droga ken dadduma pay a pangta iti kinatalged ti publiko.
