LAOAG CITY – Inadmitir ti Philippine National Police’s Criminal Investigation and Detection Group (PNP-CIDG) a marigatan da a mangammo ti lokasyon ni dati a presidential spokesperson Atty. Harry Roque,
Maipalagip a ni Roque ket naiyisoan ti contempt ken detention orders babaen ti House Quad Committee gapu iti maipagarop a kaadda ti koneksyon na iti illegal activities ti Philippine offshore gaming operators (POGO).
Inlawlawag ni Philippine National Police’s Criminal Investigation and Detection Group spokesperson Police Lieutenant Colonel Imelda Reyes a tunggal agturong dagiti kameng ti pulisya iti maidanun kadakuada nga impormasyon seknan iti lokasyon ni Roque ket saan da pulos a madandanun daytoy gapu ta makapanawen sakbay a makadanun da iti lugar.
Nupay kasta, inpasigurado ni Reyes nga addan ti lead da no sadinno ti mabalin a pakasarakan da kenni Roque ngem saadan a kayat nga idetalye pay gapu ta madlaw da nga arigna mapakadaan ti dati a presidential spokesperson dagiti otoridad, rason a agbaliw-baliw ti pagtalinaedan.
Mainaig iti daytoy, inpakaammo ti Bureau of Immigration nga awan ti naiparuk-at nga hold departure order kontra ken ni Roque ngem adda daytoyen iti immigration watchlist.
