LAOAG CITY – Immunamong ti Philippine National Police (PNP) ti rakurak a maipatungpal ti mandatory bag inspection kadagiti pagadalan iti buo a pagilian.
Basar iti Philippine National Police, ti nadakamat a gakat ket mainaig iti pammilin ni Presidente Ferdinand R. Marcos Jr. babaen iti panangidaulo ni Interior Secretary Jonvic Remulla tapno siguraduen ti kinatalged dagiti estudiante, mangisursuro ken dadduma pay a personalidad iti uneg ti pagadalan.
Inbatad ni Philippine National Police (PNP) chief Gen. Jose Melencio C. Nartatez Jr. a makatulong ti mandatory bag inspection tapno mallapedan ti kinaranggas kas ti napasamak a pammaltog ken pammagkong idi laeng kallabes iti uneg ti pagadalan a kinasangkutan dagiti estudiante.
Mainaig iti daytoy, adadalen ti Department of Education (DepEd) ti nadakamat a rakurak mainaig iti nadara a pammaltog iti maysa a pagadalan iti Tacloban City a nakatayan dagiti tallo nga estudiante.
Inlawlawag ti Department of Education a kitkitaenda dagiti mabalin a makalapped iti pannakaipatungpal na daytoy a gakat kas iti kinalawa ken kinaado ti populasion ti maysa a pagadalan a mabalin a mangitunda ti logistical challenges bayat iti panag-inspectda kadagiti bagda.
Kabayatanna, inpanagetget ni Nartatez a sisasagana ti ahensiada a tumulong ken makibinnulig iti Department of Education iti pannakaipatungpal ti polisia para iti napigpigsa a campus safety measures ken security protocols.
