LAOAG CITY – Inpasigurado ti Philippine National Police (PNP) a pagtigtignayendan ti umdas a bilang ti tauhan ken resources daytoy tapno tumulong iti kinakappia ken kinaurnos ti maiwayat a tallo nga aldaw a tigil-pasada a mangrugi inton bigat agingga inton Huebes, Disiembre 11.
Daytoy ket kalpasan nga inrakurak ti grupo a Mananakay at Nagkaisang Terminal ng Transportasyon (Manibela) a ti 3 nga aldaw a nationwide transport strike kas protesta iti sobra a kinangato ti multa ken nabayag a panangiproseso dagiti dokumento ti gobierno.
Naammoan a maysa kadagiti pagdanaganda ket ti agtultuloy a panangobligar dagiti otoridad kadagiti driver ken operator ti unconsolidated public utility vehicles a mangala ti provisional authorities iti baet ti sangsangoen a multa ken pannakaitantan iti panangiproseso dagiti dokumento dagitoy.
Inbatad ni Philippine National Police Chief Police Lt. Gen. Jose Melencio Nartatez Jr., inbilinnan kadagiti police commanders a makikoordinar kadagiti lokal a gobierno ken dadduma pay nga ahensia tapno masigurado ti kinatalged iti nasao a maiwayat a tigil-pasada.
Kunana a mai-deploy dagiti police personnel kadagiti kangrunaan a transport hub, kangrunaan a kalsada ken dagiti maapektaran a ruta ti nasao a tignay protesta.
Malaksid iti daytoy, mangikabilda pay dagiti police vehicle a nakasagana a mangipaay ti tulong kadagiti commuter a mabalin a maitantan wenno marigatan a makabiruk ti pagluganan.
