LAOAG CITY – Pormalen nga inyuswat ti Philippine National Police (PNP) ti Joint Anti-Kidnapping Action Commitee (JAKAC) iti Camp Crame.
Gagem ti binukel a koite a paigetan ti panangsolbar kadagiti kaso ti kidnapping iti pagilian iti moderno a panawen.
Indaulwan ni Philippine National Police Chief Police General Rommel Francisco Marbil ti nasao a seremonya kadwa na ti dadduma pay nga agency partners ti nailian a pulisya.
Iti panagbitla ti Marbil, inbatad na a ti panangiyuswat da ti nasao a komite ket maysa a napateg nga addang ti gobierno kontra iti kidnapping ken illegal detention.
Aminado ni Marbil nga iti napalabas a tawen ket nagbalin nga ad-adda pay a komplikado, organisado, ken transnational dagiti kaso ti kidnapping iti pagilian no sadinno a ti target ket dagiti babbai, ubbing, negosyante ken uray dagiti gangannaet nga adda iti pagilian.
Innayon ni Marbil a napateg a mairaman iti komite ti nagduduma nga ahensya ti gobierno kas ti National Bureau of Investigation, Department of Justic ken Anti-Money Laundering Council gapu iti baro a pattern ti kidnapping iti pagilian.
