LAOAG CITY – Ad-adda a pinaigetan ti Philippine National Police ti panagbantay iti iligal a panagipangato ti plete kadagiti pampubliko a transportasyon.
Inbatad ni PNP Chief PGen. Jose Melencio Nartatez Jr., nga addan ti inwaras da a kameng ti nailian a pulisya kadagiti bus terminals iti nagduduma a paset ti pagilian.
Tultulungan da ti Land Transportation Franchising and Regulatory Board (LTFRB) iti panagmonitor kadagiti iligal nga agkolkolektar iti nangato a plete.
Maipalagip a pinakanselar ni Presidente Ferdinand Marcos Jr. ti panagngato ti plete tapno makissayan ti padagsen kadagiti umili iti panawen ti krisis.
