LAOAG CITY – Nasken a saan nga ialeng-aleng dagiti operatiba ti Philippine National Police ken National Bureau of Investigation tapno biruken ken ipatungpalen ti warrant of arrest kontra ken ni Kingdom of Jesus Christ Pastor Apollo Quiboloy.
Iti press briefing, saan a nailemmeng ni House Deputy Speaker ken Quezon 2nd District Rep. David Suarez ti pannakadismayana gapu ta nasurok maysa a bulanen sipod nangiparuk-at ti warrant of arrest ti korte iti kaso a human trafficking, child ken sexual abuse ket saan pay a natiliw dagiti otoridad ni Quiboloy.
Idi Abril 6 ket nangiruar ti warrant of arrest ni Pasig Regional Trial Court Branch 159 Judge Rainelda Estacio-Montesa kontra ken ni Quiboloy.
Malaksid iti daytoy, Marso 19 ket naiyisyuan pay ti arrest order ti Senado ni Quiboloy maipapan iti ‘sex crimes‘ a pakairamramanan ti Pastor.
Immunan nga inbatad ti dati a Presidente Rodrigo Duterte a ni Quiboloy ket adda idiay Davao laeng no sadino dinakamatna a ni Quiboloy ket adda iti 8 nga ektarya iti Mt. Tamayong Prayer Mountain a kukuana daytoy iti siudad ti Davao.
Kuna ni Suarez a masdaaw daytoy no apay iti baet ti warrant of arrest a naiyisyu ken ni Quiboloy ket saan latta a masapulan ken maarestar dagiti otoridad.
Inpalgak ni Suarez a ti saan a panagpakita ni Quiboloy ket mangipakpakita ti kinaawan ti respeto kadagiti institusion ti gobierno pakairamanan iti linteg.
Naminsan manen a nagppanawagan ni Suarez kadagiti law enforcement agencies nga ipatungpalen ti warrant of arrest, biruken ken arestaren ni Quiboloy tapno agtalidtid ti proseso ti linteg kontra iti daytoy.
