LAOAG CITY – Mangi-deploy ti agarup 70 a ribu a tauhan ti Philippine National Police (PNP) para iti panangrugi ti Simbang Gabi inton Disiembre 16 agingga iti Disiembre 24.
Naikeddeng a mai-deploy dagiti pulis kadagiti simbaan ken dadduma pay a lugar a posible a pagdudupudopan ti publiko tapno masigurado ti kinatalged dagitoy.
Inrakurak ni Acting Philippine National Police Chief PLtGen. Jose Melencio Nartatez Jr. nga ad-adda a paigetan ti nailian a pulisia ti panangiwayatda kadagiti panagpatrolya, panangipatungpal ti checkpoints ken panangikabil kadagiti mobile units kadagiti aglawlaw a sakupen ti simbaan.
Kagiddan iti daytoy, pinapigsa ti nailian a pulisia ti pannakikoordinarda kadagiti lokal a gobierno, dagiti opisial ti barangay ken simbaan para iti naurnos a crowd management ken alisto a panagresponde.
Kabayatanna, karaman kadagiti banbantayan ita ti Philippine National Police dagiti insidente ti panagtatakaw, pickpocketing ken iti taray ti trapiko.
