LAOAG CITY – Agtultuloy ti naiget a koordinasyon ti Philippine National Police kadagiti mangngalap kalpasan nga adda ti lima a pakete ti shabu a nakita iti baybay, partikular iti ili ti Burgos ken Pasuquin ditoy probinsya.
Daytoy ti inpasigurado ni Provincial Director Police Col. Frederick Obar.
Inbatad ni Obar a saan da a kayat ti agipapan nga adda dagiti saan a naiturnover kadakuada isut gapuna nga agtultuloy ti pannaki-koordinar da kadagiti mangngalap iti intero a probinsya.
Innayon na a kanayun ti panangpalagip da kadagiti mangngalap a no adda ti makita da a pakete a kas kadagiti immunan nga in-turnover dagiti mangngalap iti kallabes ket masapol nga ipakaammo da a dagus kadakuada.
Inpakaammo pay ni Obar nga adda ti maited a gunguna kadagiti makai-turnover ti makita iti baybay a nakapakete a shabu manipod iti gobierno probinsyal ken iti Philippine Drug Enforcement Agency (PDEA).
