LAOAG CITY – Nangrugin ita nga aldaw, Mayo 3, 2025 ket nagbalinen a full alert status ti Philippine National Police kas panagsagsagana iti umas-asideg nga eleksion inton Mayo 12.
Segun ken ni Philippine National Police Chief Rommel Marbil nga addan iti ground dagiti kameng ti kapulisan.
Inbilinna dagiti kapulisan a paigetan ti panagbantay tapno masigurado ti kinatalged nga eleksion.
Dumanon iti sumurok 120 a ribu a kapulisan met ti nadutokan tapno agbantay iti sumurok 37 a ribu a voting centers iti intero a pagilian.
Nagpanawagan ni Marbil iti publiko a makitinnulong tapno malappedan ti asinoman nga agplanplano nga agaramid ti riribuk inton eleksion.
