LAOAG CITY – Naka-full alert ti Philippine National Police (PNP) kas panagsagsagana iti tallo nga aldaw a rally a mangrugi inton bigat, Domingo, Nobiembre 16.
Basar iti Philippine National Police, epektibo idi malem ti Biernes, pinagtignayen ti kapulisan iti intero a pagilian tapno siguradoen ti kinasaganada.
Ita nga aldaw ti Sabado, inisyal a nai-deploy dagiti sumagmamano a kapulisan ken iti panangrugi ti rally inton bigat, nakasaganan ti sibubukel a puersa ti Philippine National Police iti ground.
Maiwaras dagiti police unit kadagiti estratehiko a lokasion idiay Metro Manila a pakaiwayatan ti rally idinto a dagiti regional office ti Philippine National Police iti pagilian ket nabilin a paigetan ti security operations kadagiti masakupanda a lugar.
Iti maysa nga statement, inrakurak ni Philippine National Police chief PLt.Gen. Jose Melencio Nartatez Jr. a naka-activate ti comprehensive security plan a sakup ti ground operations, panangimaton iti taray ti trapiko, intelligence monitoring, emergency response pakairamanan ti maritime patrols.
Inpetteng ti Philippine National Police chief nga iresrespetarda ti karebbengan ti publiko a mangiwayat ti naannayas a panaguummong ngem inallukoyna met dagiti agatendar iti rally a suruten dagiti safety reminders ken makitinnulong iti kapulisan nga adda iti ground tapno mapagtalinaed ti kalmado ken nakappia a panangiwayat ti nasao a rally.
