LAOAG CITY – Nakaalerto ti Philippine National Police (PNP) iti posible a tignay protesta inton bigat, Marso 11 kagiddan ti umuna nga anibersario sipod inarestar, inyakar ken inbalud ni dati a Presidente Rodrigo Duterte idiay The Hague.
Inbatad ni Philippine National Police Chief General Jose Melencio Nartatez Jr. a nakamonitor ti Philippine National Police ti sumagmamano a post nga agpanpanawagan ti maysa a nalawa a motorcade rally.
Basar iti report, ti plano a ruta ket dumalyasat iti paset ti EDSA ken aglippas iti Villamor Airbase kas pananglagip iti umuna nga anibersario ti panangikabil iti dati a Presidente iti international custody tapno sangoen dagiti kaso nga adda ti pakainaiganna iti crimes against humanity.
Mainaig iti daytoy, inbilin metten ni Nartatez ti kapulisan a nayonan ti deployment iti nasao nga area pakairamanan idiay Davao City nga isu ti baluarte ni dati a Presidente Duterte.
Inpalagip ni Nartatez ti naiget a panangipatungpal ti maximum tolerance ken panagtignay a maiyataday iti linteg kadagiti Philippine National Police personnel.
Kunana a dagiti mangiwayat ti tignay protesta ket masapul nga ipakat ti disiplina ken suroten dagiti abiso dagiti otoridad tapno maliklikan ti riri.
