LAOAG CITY – Addan ti pakabuklan a 1,023 nga indibidual dagiti naarestar gapu iti panaglabsing da ti election gun ban ditoy pagilian.
Basar iti Philippine National Police (PNP), ti nasao a bilang ket nairekord agingga idi Pebrero 18 ita a tawen.
Manipod iti nasao a bilang ket kaadoan ti aggapo iti Metro Manila nga addaan ti 306, sumaruno ti Central Luzon a 162 idinto a 138 met iti Central Visayas.
Karaman kadagiti naarestar ket 5 a PNP personnel, pito a kameng ti Armed Forces of the Philippines, lima a personnel manipod iti dadduma a Law Enforcement Agencies, dua nga elected government officials, dua nga appointed government officials, 22 a security guards, uppat a gangannaet, maysa a CAFGU Active Auxiliary, dua nga agtutubo ken 973 a sibilyan.
Umabot metten iti 1,019 a firearms ti nakumpiskar manipod kadagiti gun ban violators a pakairamanan ditoy ti 403 revolvers, 306 pistols, 41 gun replicas, 26 explosives, 26 Class A guns, 10 rifles, walo a shotguns, tallo a Class B guns, ken 196 a sabsabali pay.
