LAOAG CITY – Nangiruar ti moratorium ti Philippine National Police kontra iti pannakaikkat dagiti makitkita a tattoo iti bagi dagiti pulis.
Inbilin ni Philippine National Police Chief Gen. Rommel Marbil ti Directorate for Personnel and Records Management tapno ipatungpal ti moratorium kabayatan ti pannakarebisar ti Memorandum Circular 2024-023 a mangimanmandar iti pannakaikkat kadagiti makita a tattoo kadagiti kameng ti Philippine National Police.
Kalikagum ni Marbil a maipasigurado a saan a maapektaran iti salun-at ken bagi ti pannakaikkat ti tattoo dagiti pulis.
Naiyataday iti Memorandum Circular 2024-023 nga amin a kameng ti kapulisan nga addaan ti tattoo a mangipaay ti written affidavit a mangideklara kadagiti tattoo dagitoy ken pannakaikkat dagiti visible tattoo-da.
Gagem pay ni Marbil a maliklikan ti aniaman a diskriminasion ken isyu iti pannakaikkat dagiti tattoo isu a dagus a nangiparuk-at ti pannakasuspinde maipapan iti daytoy a banag.
Kabayatanna, saan met a karaman ti aesthetic tattoo kas ti eyebrow ken lip tattoos.
