LAOAG CITY – Nangiparuk-at ti memorandum ti Philippine National Police (PNP) maipapan iti kaadda ti tattoo dagiti personnel, applicants pakairamanan dagiti kadete iti akademia.
Segun ken ni Philippine National Police spokesperson Col. Jean Fajardo, nailanad iti Philippine National Police Memo 2024-023 a nasken nga agisubmitir ti affidavit nga ikkatenda dagiti tattoo dagiti personnel a makitkita.
Inbatadna a saanda nga awaten iti asinoman nga adda ti tattoo-na iti nailian a pulisia.
Inlawlawagna a dakamatenda iti affidavit no ania a klase ti tattoo ti adda kadakuada ken pawilanda a maaddaan ti tattoo a saan a makaluban iti uniporme dagitoy.
Innayonna nga ikkanda ti tallo a bulan tapno ikkaten dagiti tattoo ken no saanda a maaramid ket sumangoda ti administrative case.
