LAOAG CITY – Rinugyanen ti Philippine National Police ti agsagana para iti panangipaay da ti seguridad, agarop maysa a tawen sakbay ti 2025 Midterm Elections.
Segun ken ni Philippine National Police Chief, Police Gen. Rommel Francisco Marbil, ti umuna a kasapulan a saganaan da ket ti panangrugi ti panagpila ti Certificate of Candidacy intono Oktubre ita a tawen.
Inpakaammo na nga in-inuten a mabukbukel ken ipinpinal da dagiti plano ti nailian a pulisya seknan iti daytoy a banag.
Innayon na a ti maikadwa nga aramiden da ket ti mangpukaw kadagiti Private Armed Group (PAG) a possible a mausar iti panawen ti kampanya, possible a panagwaras dagiti paltog nga awan ti maiyannatop a lisensya, ken ti pananglapped iti panaggaraw dagiti sindikato ti illegal a droga.
Basar iti heneral, inbilin nan kadagiti ground commander a papigsaen da pay ti koordinasyon da kadagiti lokal a gobierno ken bantayan dagiti lugar a maibilang kas hotspot areas.
Kas iti siguden nga ar-aramiden ti nailian a pulisya ket nayunan da dagiti pulis kadagiti lugar a maestablisar kas election areas of concern.
Gapu iti daytoy, kuna ni Marbil a kasayaatan a bayat a nasapa pay ket nakabantayen dagiti pulis iti sitwasyon iti masakupan da a lugar.
