LAOAG CITY – Ibilang ti Philippine National Police (PNP) iti ili a San Nicolas nga idadaulwan ni Police Chief Inspector Paul Benedict Parado a dakkel a tulong ti iyus-uswat da a checkpoint iti nagduduma a paset ti nasao nga ili tapno maliklikan dagiti nagduduma a krimen.
Inbatad ni Parado a saan laeng a dagiti motorsiklo ti sitsitaen da no di ket uray dagiti 4-wheel vehicles.
Inlawlawag ni Parado a saan laeng nga iti daytoy election period nga ar-aramiden da ti agcheckpoint no di ket agtultuloy daytoy tapno maipasigurado ti linak, urnus ken talna iti intero nga ili.
Innayon na a no iti kallabes ket doble ti kinaiget ti iyus-uswat da a checkpoints, iti agdama ket triple payen ti ar-aramiden da para iti mapaspasangasangan ti 2019 midterm elections.
