LAOAG CITY – Pinalagipan manen ni Police Chief Master Sergeant Eric Bumagat, ti mangidadaulo iti Philippine National Police – Traffic Division ditoy ciudad ti Laoag, dagiti tricycle drivers ken operators a masapol a suruten a naimbag ti baro a fare guide ditoy ciudad.
Basar iti baro a fare guide iti tricycle ditoy ciudad ti Laoag, nagbalinen a 20 a pisos ti regular fare idinto a dagiti estudyante, senior citizen ken Person with Disability ket 15 a pisos ken dagiti agtawen ti 5 agingga iti 12 ket 10 a pisos.
Inpetteng ni Bumagat a suruten koma a naimbag daytoy dagiti agpaspasada ti tricycle ditoy ciudad gapu ta isu ti naipalaon iti naaprubaran nga ordinansa.
Mainaig iti daytoy, binalakadan ni Bumagat dagiti pasahero a masingir iti nangina unay babaen iti pagluganan da a tricycle a saan nga agbuteng ken agpangadua nga agreport iti opisina da.
Innayon na a masapol a maikkan ti leksyon ken pagmenna-mennaan dagiti tricycle driver nga abusado ditoy ciudad ti Laoag.
