LAOAG CITY – Nagballaag ni Police Staff Sergeant Alexson Rosal, Duty Desk Officer ti Philippine National Police – Laoag Traffic Division kadagiti motorista iti doble a panagan-annad dagitoy kabayatan ti panangiturongda kadagiti luganda.
Segun kenkuana, sipod idi rabii ket nagsasaruno dagiti napasamak a desgrasia ditoy siudad ti Laoag no sadino adda ti naimaldit a walo a road crash incidents kadagiti nagduduma a Barangay ditoy siudad.
Inbatadna a pakairamanan ditoy iti Brgy. Calayab, Brgy. 7, Brgy. Tangid, Brgy. Nangalisan ken Brgy. Bengcag ditoy siudad ti Laoag.
Kunana a kaadduan kadagiti napasamak a desgrasia ket self vehicular incident ken nabartek kabayatan ti biahe dagitoy.
Inlawlawagna a maysa a kadagiti biktima ket naidungpar iti barikada iti paset ti Gilbert Bridge ditoy siudad.
Innayonna a gapu iti daytoy ket adda ti panagirot iti taray ti trapiko ngem dagus met laeng daytoy a nasolbar babaen ti panagresponde dagiti otoridad.
