LAOAG CITY – Nadismaya ni Police Major Joseph Baltazar, ti chief of police iti ili ti Vintar kalpasan a naduktalan da ti panangswitik kadakuada ti babai nga insalakan da a naistranded iti kubo-kubo nga adda iti tengnga iti Bislak River.
Inlawlawag ni Baltazar nga idi damo ket nagpabigbig ti babai kas Geraldine Bartolome a taga Gattaran, Cagayan ngem naduktalan da a ti pudpudno a nagan na ket Myra Talimongan y Mateo, agtawen ti 38 ken residente iti Barangay 3 iti ili ti Currimao.
Inbatad na a ti palawag kadakuada ni Talimongan ket taga Cagayan ngem napan iti ili a Solsona nga isu ti ayan ti asawa na ngem nagsina dan isut gapuna a napan iti ili ti Vintar.
Rumrumuar a kabayatan ti kaadda na iti kubo-kubo iti bislak-river ket dimakkel ti danom isut gapuna a saanen a nakapanaw ken napan insalakan dagiti kameng ti pulisya ken rescue team iti ili a Vintar.
Segun ken ni Baltazar, kalpasan a naisalakan da ni Talimongan kellaat a nagsakit ti buksit na isut gapuna nga inpan da iti Governor Roque Ablan Senior Memorial Hospital (GRASMH) ditoy ciudad ti Laoag, ken ditoy nga adda ti nakakita kenkuana a taga Currimao nga isu met ti napan nangibaga iti balayda.
Innayon na a babaen ti kabsat ti nasao a babai a ni Freddie Talimongan ket naamoan da ti pudno a kinatao ti maseknan.
Inpalgak ni Baltazar a saanna a maawatan no apay a nagusar pay laeng ti sabali a nagan ni Myra Talimongan.
Inpakaammo ti opisyal a basar iti panagim-imbestigar da ket adda dagiti nakautangan ni Myra Talimongan a saanna pay a nabaybayadan.
Iti agdama ket nakarwaren iti nasao a babai iti ospital ken inyawiden ti kabsat na a ni Freddie Talimongan.
