LAOAG CITY – Nangipatayab ti Poland ti jets kalpasan nga inrakurak ti Ukraine nga adda ti 5 a natay iti Russian strikes.
Nagpatpatnag a nangiwayat ti Russia ti missile ken drone attacks idi Sabado ken bigat ti Domingo a nakasentro iti dakkel a paset ti western city ti Lviv.
Kinumpirmaran ti Polish military a nangipatayab ti Poland ti fighter jets tapno masigurado ti kinatalged ti Polish airspace ken nai-deploy pay ti Allied Nato aircraft.
Inbatad ni Ukrainian President Volodymyr Zelensky nga adda ti lima nga indibidual ti natay gapu iti Russian strikes iti nasao a pagilian no sadinno nga uppat kadagiti natay ket iti Lviv idinto a ti maysa ket iti Zaporizhzhia.
Inlawlawagna a nangiwayat ti Russia ti sumurok 50 a missiles ken agarup 500 nga attack drones iti Ukrainian infrastructure.
Kunana a karaman pay kadagiti tinarget ti Russia ket iti Ivano-Frankivsk, Chernihiv, Sumy, Kharkiv, Kherson, Odesa ken Kirovohrad regions.
Inpettengna a kasapulanda ti naig-iget a proteksion ken al-alisto a pannakaipatungpal kadagiti amin a defense agreements pakairamanan ti air defense tapno malabanan ti aerial terror.
Kabayatanna, saan met pay a nangipaay ti aniaman a komento iti nagpatnag a panangatake ti Russia idiay Ukraine.
