LAOAG CITY – Pormalen a dinutukan ni Presidente Ferdinand Marcos Jr. ni Police General Benjamin Acorda Jr. kas baro a mangidaulo iti Philippine National Police kasukat ni retired Chief General Rodolfo Azurin.
Ni Acorda ket manipod iti Philippine Military Academy (PMA) Sambisig Class of 1991.
Nagserbi ni Acorda kas hepe ti Balungao, Sison, Bolinao ken Sual Municipal Police Station iti Pangasinan sakbay a nagbalin a Provincial Director ti Palawan Police Provincial Office (PPO) manipod 2014 agingga iti 2016, ken ti naudi ket nagserbi kas hepe ti Directorate for intelligence (DI) ti PNP.
Nagturpos iti elementarya ni Acorda iti Gabaldon Elementary School’s Special Education Center iti Laoag City ken iti sekondarya ket iti Bacarra National Comprehensive High School nga isu ti nagam-ammoan da iti asawa na a ni Oliva Balasi Afaga no sadinno a naaddaan da ti uppat nga annak.
Nagun-od ni Acorda ti Master’s Degree in Management iti Philippine Christian University.
Ni Acorda ket recipient ti Bronze Cross Medal, ti “prestigious single grade military decoration” ti Armed Forces of the Philippines a naipaay kenkuana para iti ‘heroism involving risk of life’
Ni Police General Benjamin Acorda Jr. ket taga Ilocos Norte.
Kabayatanna, nagyaman met ni Police General Rodolfo Azurin Jr. kadagiti timmulong kenkuana iti panangidaulo na iti Philippine National Police iti uneg ti walo a bulan ken 23 nga aldaw.
Kuna met ni General Acorda a kalikagom na ti peaceful ken crime free community iti panagtugaw na kas mangidaulo iti nailyan a pulisya
Nagyaman pay kenni Pres. Ferdinand Marcos Jr. iti naipaay kenkuana a gundaway a mangidaulo iti Philippine National Police.
