LAOAG CITY – Inpasigurado ni House Committee on Appropriations Chairperson ken Representative Mika Suansing a ti P1 billion a pondo para iti Project Nationwide Operational Assessment of Hazards wenno Project NOAH iti babaen ti 2026 General Appropriations Act ket direkta a mapan kadagiti lugar a permi nga agkasapulan ti proteksion kontra iti layus.
Kuna ti chair ti House of Appropriations a ti pondo ket rumbeng a direkta a maipapan iti ad-adda a napapigsa a flood ken hazard mapping, barangay-level early warning systems ken eksakto a panangkita dagiti lugar a kasapulan ti flood mitigation.
Inpettengna ti kinapateg ti naiget a panangtingiting kadagiti proyekto sakbay a mairaman iti national budget.
Segun ken Suansing, mangisayangkat ti Kamara ti baro a tukad ti panangtingiting kadagiti deliberasion tapno masigurado dagiti proyekto ket pudno a kasapulan ken naurnos a naipatungpal.
