LAOAG CITY – Maiyakar ti pondo ti Health Facility enhancement program ti Department of Health a naiyalukar manipod iti Pagudpud District Hospital ket maikabil iti Bangui District Hospital.
Daytoy ket agbalor ti 20 a milyon a pisos manipod iti capital outlay ti 2025 para ti pannakapapintas ti serbisyo ti nasao nga ospital.
Segun kenni Dr. Medeldorf Gaoat, Sang Panlalawigan member ken chairman ti Committee on Health ditoy probinsia, ti immuna a nakaipan iti appropriation ordinance ket Pagudpud District Hospital ngem daytoy nga ospital ket maaw-awagan ti Pagudpud Extension Hospital gapu ta adda iti babaen ti Bangui District Hospital.
Kunana a babaen ti resolusyon ket maikorehir daytoy tapnu nasaysayaat ti pannakaiyimplementar ti programa.
Mainaig iti daytoy, adda ti pammalubos ni Gov. Matthew Marcos Manotoc a maiyalisto daytoy ken inaprobaran met nga insigida ti Sang Panlalawigan apaman a naidasar iti session iti maikadwa ken maudi a pannakaibasana.
