LAOAG CITY – Inabisoan dagiti doktor ni Pope Francis nga aginana pay laeng ti nayon a dua a bulan tapno naan-anay nga umimbag ti bagina.
Daytoy ket iti baet a nakaawiden ti Santo Papa iti Vatican kalpasan ti 38 nga aldaw a panagtalinaedna iti Gemelli hospital iti Rome.
Gapu iti daytoy, saan pay a masinunuo dagiti deboto no regular a makitadan iti publiko ti agtawen ti 88 a Santo Papa.
Naammoan nga apaman a nakaruar ni Pope Francis iti ospital ket insigida a nagturong iti Casa Santa Marta a maysa a bassit a pasdek iti Vatican a nagserbi a pagtaenganna sipod nagtugaw kas Santo Papa idi 2013.
Ti nasao a pasilidad ket pagnanaedan laeng dagiti padi nga agtrabtrabaho iti Vatican no sadinno a nagbalin a naiget ti panagpastrekda kadagiti bisita ditoy.
Saan pay a sigurado ti Vatican no matuloy ti personal a pannakitaripnong ti Santo Papa ken ni King Charles inton Abril 8 ken inton Abril 20 nga idauloanna ti tinawen nga Easter celebration.
