LAOAG CITY – Inbutaktak ni Pope Francis nga adda ti dua a pangta iti biagna idi 2021.
Segun kenkuana, napasamak daytoy idi bimmisita isuna idiay Iraq.
Inbatad ti Santo Papa a binallaagan isunan ti British security services nga adda ti maysa a babai a suicide bomber ti nanggandat nga immasideg kenkuana.
Dagus daytoy a linappedan dagiti kapulisan ti Iraq ken pinabettakda ti nasao a bomba.
Naammoan nga adda ti maysa nga insidente a nakigeddan kadakuada a napaspas a lugan nga addaan ti intension a dungparen ti naglugananda a lugan.
Maipalagip nga ibilang ti Vatican a ti panagbisita idi ti Santo Papa ket maysa a karirisgoan a panagbisita gapu ta malaksid iti security reason ket agdama a mapaspasamak ti COVID-19 pandemic.
Nupay kasta, desidido ti agtawen iti 88 a Santo Papa a papanan ti Iraq gapu ta karaman iti pakasaritaan iti bibliya.
