LAOAG CITY – Kiniddaw ni Pope Francis kadagiti katoliko nga ikararagan da bayat iti agtultuloy a panagpaagas na iti ospital para iti double pneumonia.
Ti Santo Papa ket saan a nakaipaay ti tradisyunal nga Angelus prayer iti personal para iti maikadwa a domingo.
Nupay kasta, iti maysa a mensahe nga insurat na kadagiti naglabas nga aldaw ket inbatad na a kumpiyansa nga agtultuloy ti panagpaospital na iti Gemelli Hospital tapno itultuloy ti panagpaagas na.
Iti mensahe ti santo papa a naiparuk-at ita nga aldaw, nagyaman kadagiti doktor ken health workers iti ospital ken dagiti well-wishers a nangidanun ti mensahe na kenkuana.
Immunan a naadmit ti agtawen ti 88 a santo papa iti nadakamat nga ospital idi Pebreo 14 ita a tawen kalpasan a narigatan nga umanges iti sumagmamano nga aldaw.
