LAOAG CITY – Pimmusayen ni Pope Francis ita nga aldaw ti Lunes, Abril 21, 2025 iti tawenna a 88 kabayatan ti kaaddana idiay Vatican’s Casa Santa Marta.
Ni Pope Francis ket naipasngay kas Jorge Mario Bergoglio idi Disiembre 17, 1936 idiay Buenos Aires, Argentina ket anak dagiti imigrante nga Italyano.
Sakbay a simrek isuna iti seminario, nagadal daytoy kas chemical technician ken nagtrabaho iti industria ti taraon. Iti tawenna a 21, naaddaan isuna ti nakaro a pneumonia a nagresulta iti pannakaikkat ti akinkannawan a barana.
Idi 1958, nakipaset daytoy iti Jesuit novitiate ken nagadal iti humanities idiay Santiago, Chile. Isuna ket nagbalin a padi idi Disiembre 13, 1969 ken idi 1973, inaramidna ti perpetual vows daytoy iti Society of Jesus. Isuna pay ti nagbalin a Jesuit provincial ti Argentina manipud iti 1973 agingga iti 1979.
Kas Archbishop ti Buenos Aires idi 1998, nabigbig isuna kas simple a panagbiag, agnanaed iti maysa a bassit nga apartment ken agus-usar ti pampubliko a transportasion.
Isuna ket nagbalin a Cardinal idi 2001 iti babaen ni Pope John Paul II. Idi Marso 13, 2013, isuna ket naelektaran kas Santo Papa, ti umuna a Jesuit Pope, kaunaan a Latin America ken kaunaan a saan a Europeo iti uneg ti sumurok maysa a ribu a tawen.
Ti panangidaulona ket nakasentro kadagiti isyu kas ti panagbalbaliw ti klima ken panagtulong kadagiti marginalized a sektor ti komunidad.
