LAOAG CITY – Nangipatulod ni Pope Leo XIV ti pakpakauna nga emergency aid nga aggatad ti €100,000 wenno sumurok-kumurang $114,000 para kadagiti biktima ti napigsa a gingined a timmama idiay Venezuela.
Basar iti Vatican, aggapu ti pundo iti Apostolic Almonry, ti opisina a mangimatmaton para kadagiti napipintas nga aramid kadagiti komunidad nga agkasapulan.
Inbatad ti Vatican a ti nasao a gatad ket pakpakauna pay laeng tapno makatulong iti alisto a relief ken rescue operations para kadagiti biktima ti didigra.
Maipalagip a dinayyeg ti Venezuela ti nagsaruno a napipigsa a gingined nga addaan ti kapigsa a magnitude 7.2 ken 7.5.
Gapu iti daytoy, umaboten iti agarup 200 nga indibidual ti natay basar iti kaudian a datos dagiti otoridad.
Agtultuloy ti panagbirok dagiti otoridad kadagiti posible a nakalasat kadagiti naapektaran a lugar kabayatan a maiyur-uray pay ti datos iti pannakadadael kadagiti imprastraktura ken pagsapulan.
Malaksid iti Vatican, inpasigurado met ti dadduma pay a pagilian ken organisasion a mangipadanon ti tulong kas ti Cuba, Iran, Italy, Estados Unidos ken European Union.
