LAOAG CITY – Binabalaw ni Pope Leo XIV dagiti world governments gapu iti pannakapaay a paginaden ti global warming ken nagpanawagan ti naig-iget a panangsolbar iti pangta idinto a dagiti pagilian iti United Nations climate summit iti siudad ti Belem iti Amazon ti Brazil ket simrek iti maikadua a lawas dagiti negosasion nga addaan ti gagem a masolbar ti karigatan nga isyu iti kabiitan a panawen.
Ti mensahe ti Santo Papa ket mangipasimudaag iti kumarkaro a panagamak mainaig iti panangpakapsot iti international ambition ken panagngato ti greenhouse gas emissions a maysa nga intero a dekada kalpasan ti 2015 Paris Agreement, maysa a landmark deal a dagiti pagilian iti umuna a gundaway ket immannugot a limitaran ti global warming iti uneg ti 2 degrees Celsius a nangatngato ngem iti tukad ti pre-industrial.
Mainaig iti daytoy, inrakurak dagiti Scientists a ti lubong ket naituding a maartapan ti threshold a mangitunda ti nakarkaro nga epektona.
Kabayatanna, dagiti delegado iti steamy riverside city ket agkalkalikagum a maaddaan ti katulagan kadagiti sumagmamano a narigat a topiko pakairamanan ti climate finance ken dagiti gagem a makissayan ti emissions a dagiti dadduma pay nga agenda ket masolbar iti maudi a naikeddeng nga aldaw inton Biernes basar ken ni COP30 President Andre Correa do Lago.
