LAOAG CITY – Mapatta-patta nga umabot iti 123.96 milyon ti pakabuklan a populasyon ti Pilipinas apaman a madanun ti 2035, wenno manayunan ti sumuruk-kumurang a 14.76 milyon a tattao iti uneg ti sumaruno a 15 a tawen.
Daytoy ket basar iti kaudian a projection ti Philippine Statistics Authority (PSA).
Basar iti Philippine Statistics Authority, namnamaen a ngumato pay ti populasyon ti pagilian iti average a 0.85% iti kada tawen sipud idi 2020 agingga iti 2035, manipod iti nairekord a 109.2 milyon a populasyon idi 2020.
Agtalinaed met a kaadoan ti populasyon iti rehiyon ti Calabarzon a bukbuklen ti Cavite, Laguna, Batangas, Rizal, ken Quezon a namnamaen nga umabot iti 19.07 milyon ti populasyon apaman a madanun ti 2035.
Sumaruno ti National Capital Region (NCR) nga addaan ti 14.49 milyon ken ti Central Luzon ng addaan ti 14.02 milyon.
Kabayatanna, agtalinaed nga addaan ti kabassitan a populasyon ti Cordillera Administrative Region (CAR) nga addaan ti 2.13 milyon.
Segun iti Philippine Statistics Authority, sumagmamano a rehiyon ti manamnama a makairekord ti agtultuloy a panagngato ti population growth rate, karaman ti Bicol Region, Western Visayas, Eastern Visayas, Zamboanga Peninsula, Soccsksargen, Bangsamoro Autonomous Region in Muslim Mindanao (BARMM), ken Caraga.
Partikular a dinakamat ti Philippine Statistics Authority ti Bangsamoro Autonomous Region in Muslim Mindanao a possible a makairekord ti al-alisto a panagado ti populasyon no sadinno a ngumato ti 1.79% manipod 2030 agingga iti 2035, manipod 1.62% idi 2020 agingga ti 2025.
Kabayatanna, namnamaen a bumayag ti population growth iti sumagmamano a rehiyon kas ti National Capital Region, Cagayan Valley, Central Luzon, Calabarzon, ken Northern Mindanao.
