LAOAG CITY – Inbatad ni House Prosecutor ken Bicol Saro Party-list Rep. Terry Ridon a nasayaat no kitaen ti Office of the Ombudsman ti posible a malversation iti di umiso a panangusar ni Bise Presidente Sara Duterte iti confidential funds.
Segun kenni Ridon, mabalin nga adda malversation nga inaramid ni VP Duterte kasta met ti security officer na a ni Col. Raymund Dante Lachica ken Office of the Vice President (OVP) Special Disbursing Officer Gina Acosta.
Daytoy ket kalpasan a nadlawna ti pattern iti sumagmamano a panangikkat ti Office of the Vice President a 125 million pesos ti tunggal maysa iti confidential funds.
Kinuna pay ni Ridon a mapagduaduaan pay ti pannakausar daytoy, kas iti rent ken pannakamanehar ti safe house a dimmanon iti P16 million idi 2022 kasta met iti 1st ken 2nd quarters ti 2023.
Dinakamat pay ni Ridon ti panangkumpirma ni Office of the Vice President (OVP) Assistant Secretary ken Assistant Chief of Staff Lemuel Ortonio iti impeachment trial nga iti las-ud ti 11 nga aldaw idi Disiembre 2022, P125 milion ti nabusbos a confidential funds.
Inyunay-unay ni Ridon a nalawag a naabuso, naay-ayam ken nakusit dagiti confidential funds ti Office of the Vice President (OVP).
