LAOAG CITY – Kinablaawan ni Presidente Rodrigo Duterte ti Pamilya Edra para iti mapaspasanga-sangan a kaunaan a Global Family Reunion.
Mainaig iti daytoy, naragsak ni Kagawad Watson Edra, iti Brgy. 4, San Francisco iti ili ti Sarrat gapu iti manamnama a pannakaisayangkat ti naindaklan a reunion dagiti pamilya Edra intono Enero 2, 2020.
Namunganay daytoy idi Disyembre 2018 babaen ti panagsukisok ti coordinator kadagiti puon ti Edra agingga a napagsasanga na.
Segun kenkuana, agtitipon dagiti agapilyedo ti Edra ken dagiti naikamangan da kadagiti sabali a pamilya manipud kadagiti nagduduma a probinsya ditoy Pilipinas ken uray iti sabali a pagilyan.
Inbatad ti kagawad a narugyandan ti naiget a preparasyon ken koordinasyon kadagiti kakabagyan da basar kadagiti puon ti nasao a pamilya.
Kabayatanna, kuna met ni Mrs. Evelyn Edra Macatbag iti San Diego California a nagimbitardan kadagiti espesyal a bisita da manipud iti gobyerno national, gobyerno probinsyal ken iti lokal.
Kunana a maangay ti selebrasyon iti Civic Center iti ili ti Sarrat ken adddanto maisayangkat a Registration, Misa, Motorcade, ken Contest.
Innayon ni Macatbag nga adda iti naplano idi tawen 2016 a reunion ngem naitantantan rason a ti coordinator iti daytoy a selebrasyon ti nangipursigi.
Manamnama nga umabot ti 300 a bisita ti makipagpaset iti nasao a selebrasyon.
