LAOAG CITY – Inrakurak ni Mr. Niño Oconer, Secretary General ti La Union Peace and Justice Advocates a paspasurot laeng ni Presidente Ferdinand Marcos Jr. ken ni United States President Donald Trump.
Segun kenkuana, nasken laeng a putedenen ni Presidente Marcos ti relasion ti Pilipinas iti Estados Unidos mainaig iti saan a patas a katulagan kas ti panagserrek dagiti US bases ditoy pagilian.
Nupay kasta, saan mangnamnama ni Oconer nga aramiden daytoy ni Presidente Marcos gapu ta nalawag para kadakuada nga agpapadiktar laeng isuna kadagiti kalikagum ti Amerika.
Inlawlawagna a no agtultuloy ti pannakikammayet ni Marcos iti Estados Unidos ket dakkel ti posibilidadna a mairaman ti gubat ti pagilian.
Kabayatanna, inpakaammo ni Oconer a ti nasken nga aramiden ti gobierno ket saan a band-aid solution kas ti panangkissay ti aldaw iti panagtrabaho dagiti empleado no diket epektibo nga addang kas ti panangsuspenso iti panangikkat ti 12% a Value Added Tax iti langis, excise tax ken ti panangibasura ti oil deregulation law.
