LAOAG CITY – Inlawlawag ti Malacañang a saan pay a nalpas ti panangdusa kadagiti karaman iti maanomalya a flood control projects.
Daytoy ti inlawlawag ti Palasyo iti rakurak ni Presidente Ferdinand Marcos Jr. mainaig iti kinaawan ti “Merry Christmas” kadagiti karaman iti anomalya.
Inbatad ni Palace Press Officer Claire Castro, saan daytoy a mangdakdakamat kadagiti nagan no diket kadagiti indibidual a nakabaluden kalpasan a naiparuk-at dagiti warrant of arrest iti uneg ti sumurok uppat a bulan.
Kunana nga adda ti nalawag a resulta ti kampania ti administrasion kontra iti korapsion, adda dagiti naipabalud, adda dagiti sanikua a na-freeze ken adda dagiti narugian a naipasubli dagiti takaw a pundo ti gobierno.
Innayon ti Palasyo nga agtultuloy ti imbestigasion ken iyur-uray ni Presidente Marcos ti resolusion ti dadduma pay a kaso a nakapenpen iti Department of Justice ken Office of the Ombudsman.
