LAOAG CITY – Inpasigurado ni Presidente Ferdinand “Bongbong” Marcos Jr. iti publiko nga agtalinaed ti P20 iti kada kilo ti bagas a programa ti gobierno.
Inbatadna a ti P20 iti kada kilo ti bagas ket saan a temporario nga addang ken dandanin a marikna dagiti ad-adu pay a pampubliko a tiendaan iti intero a pagilian.
Inlawlawagna a ti nasao a programa a mairubuat iti babaen ti Kadiwa ng Pangulo outlets para kadagiti nakakapsot a sektor ket paset ti panangikagumaan ti administrasion a mangipaay ti nalaka a taraon ken papigsaen ti sektor ti agrikultura iti babaen ti agtultuloy a panagtitinnulong ti nailian ken lokal a gobierno.
Daytoy nga inisyatiba ket maaw-awagan kas “Benteng Bigas Meron na! (BBM)” ket maysa kadagiti inkari ti kampania ni Marcos.
Kabayatanna, ti P20 iti kada kilo ti bagas ket agdama a maipapaay kadagiti senior citizens, solo parents, persons with disabilities, indigent family ken minimum wage earners nga addaan ti maysa a milyon a target a benepisiario iti katapusan ti tawen.
