LAOAG CITY – Kalikagum ni Presidente Ferdinand Marcos Jr. nga ikkaten dagiti unprogrammed appropriations dagiti programa ti Department of Social Welfare and Development (DSWD).
Iti naiyuswat a taripnong iti Malakanyang kaduana ni Department of Social Welfare and Development Sec. Rex Gatchalian, inrakurak ti Presidente a mangrugi inton sumaruno a tawen ket nasken nga awanen ti unprogrammed funds kadagiti programa ti nasao nga ahensia tapno maipasigurado ti al-alisto a maipadanon kadagiti agkasapulan.
Karaman iti taripnong dagiti economic managers nga isuda Budget Sec. Amenah Pangandaman, Finance Sec. Ralph Recto, National Economic and Development Authority Sec. Arsenio Balisacan ken dadduma pay nga opisial.
Maipalagip a nagkiddaw ti Department of Social WElfare and Development ti P41.8 billion pesos a kanayonan a pundo nga alaen iti unprogrammed appropriations tapno mausar iti grants ti Pantawid Pamilyang Pilipino Program wenno 4Ps manipud iti Agosto agingga inton Disiembre 2025.
Natalantan pay iti nasao a taripnong ti pundo ti ahensia iti babaen ti 2025 General Appropriations Act ken National Expenditure Program.
