LAOAG CITY – Mamati ti Malacañang a natungpal ti inkari ni Presidente Ferdinand Marcos Jr. nga adda dagiti mapagsungbat sakbay ti paskua mainaig iti maanomalya a flood control projects.
Inbatad ni Palace Press Officer Claire Castro, adda dagiti saan a nagbalin a “merry” ti paskua gapu ta addan dagiti naisyuan ti warrant of arrest ken addan dagiti naibaluden mainaig iti flood control anomalies kas ken ni Sarah Discaya.
Rakurak daytoy ti Palasyo kagiddan dagiti pammabalaw a saan a natungpal ti inbatad ti Presidente gapu ta awan met ti naibalud a “big fish.”
Nupay kasta, kuna ni Castro, saan a mabalin nga iwalin ti due process iti panangsungbat kadagiti karaman pakairamanan dagiti pulitiko a maitudtudo iti isyu gapu ta napatpateg ti natibker a kaso tapno saan nga agbalin a narasi ti hustisia.
Inpettengna nga awan ti dinakamat a partikular a nagan ti Presidente idi inbatadna ti rakurak mainaig kadagiti mapagsungbat sakbay nga agpaskua ken nasken a saan daytoy nga ikkan nga insigida ti kayat a saoen a kas panangikari ket insigida a maipabalud ti asinoman a nangato ti posisionna.
Inadmitir ti Palasyo a mariknada ti gagar ti publiko a makita no asino ti naan-anay a mapagsungbat iti flood control scandal ngem inpettengna a ti hustisia ket saan nga iyal-alisto ken masapul a dumalan iti husto a proseso ti linteg.
