LAOAG CITY – Inbilin ni Presidente Ferdinand Marcos Jr. ti Department of Budget and Management (DBM) a paigetan iti panangipatungpal ti 2026 national budget.
Daytoy ket tapno maipasigurado nga awan ti pundo nangruna kadagiti baro a programa ken dagiti baro a budget items nga innayon ti Kongreso a basta laeng a mairuar wenno mausar a saan a dimmalan iti husto a proseso.
Inbatad ti Presidente nga iti P6.793 Trillion General Appropriations Act (GAA) nga amin a baro nga items ken nayon a pundo nga inaprobaran ti Kongreso ket saan nga otomatiko a maiparuk-at ken kasapulan pay laeng a maipasigurado a nakastrek dagitoy iti cash programming ti gobierno.
Mainaig iti daytoy, nasken nga agtungtungpal iti fiscal safeguards, maiyataday iti maipatpatungpal a budget rules ken procedures ken adda ti pammalubos ti Presidente basar kadagiti prioridad ti gobierno.
Inpetteng ni Marcos a ti panangipasa ti national budget ket rugi pay laeng ken ti nadagdagsen a trabaho ket ti umiso a panangipatungpal daytoy ken iti panangipasigurado a mapagsungbat dagiti aglabsing.
